مکھڑا گھنڈ چوں باہر جے آیا ویکھاں گے

مُکھڑا گھُنڈ چوں باہر جے آیا ویکھاں گے

سجن جے نہ مُکھ پرتایا ویکھاں گے

مست ہَوا وِچ زُلف دا کُنڈل کُھلے گا

کالا بدل سِر تے چھایا ویکھاں گے

اوہدی سجلی سجری مہندی چُماں گے

گوری بانہہ دا گجرا پایا ویکھاں گے

موسم دی رفتار توں اگے جاواں گے

ساہواں جو طوفان مچایا ویکھاں گے

تتلی اوہدے بُلھاں وَلے آوے گی

بھنورے جہڑا سُر چھنکایا ویکھاں گے

چَن دی چھاویں جھانجر شور مچاوے گی

رُکھاں اوہلے اوہدا سایا ویکھاں گے

اکھاں اگے اوہدا جوبن ہووے گا

پلکاں جہڑا پلنگ وچھایا ویکھاں گے

وصلاں والی رات ہُلارے کھاوے گی

یار، صفیؔ دے وِچ سمایا ویکھاں گے

سرفراز انور صفی