پنجابی پوٹھواری پوٹھوہاری پہاڑی شاعری
مھاڑا بہُوں دل ڈھولے نال
مھاڑا ڈھولا اے، لوکو! بَخرا
اس ناں بَخرا، رنگ تے نَخرہ
دِسنا باہر، تے اندر بَسنا
اندر ہَسنا، باہر وی ہَسنا
اکھیاں مارے، اوہ ہر پاسے
میں ہاں سوہنی، اوہ مہینوال
مھاڑا بہوں دل، ڈھولے نال
کھڑنیاں اندر، ہَسنیاں اندر
اُجڑیاں اندر، بَسنیاں اندر
جنگلاں تے، اجاڑاں اندر
پانیاں تے، پہاڑاں اندر
مھاڑے ڈھولے نی، اکھ تَکنی
اس ناں رنگ میں، دی نہ سَکنی
نی اوہ رانجھا، میں ہیر سیال
مھاڑا بہوں دل، ڈھولے نال
نَچنا آپ، تے مِکی نچانا
نالے نَچنا، نالے گانا
نیں! میں تَکی تَکی نہ، رَجنی
اُس نی مُرلی، اندر بَجنی
نی! مِکی حال، کوئی پئی گَچھنا
دل ناں مھاڑے، قابو اَچھنا
میں ہاں گزری، ڈھول گوال
مھاڑا بہوں دل، ڈھولے نال
ودھاتا سنگھ تیر
