دکھ رج رج داتا نوں سنائیے، میلے نے وچھڑ جانا
جیویں مندا اے داتا نوں منائیے، میلے نے وچھڑ جانا
کل خورے نہ رل کے بہئیے اج داتا نوں دل دئیاں کہئیے
لیکھاں سُتیاں نوں سجنو! جگائیے، میلے نے وچھڑ جانا
جو منگناں اے اج منگ لو سارے، رنگ داتا دا رنگ لو
قسمت نال ایہہ ویلا لبھدا، روپ داتا دا روپ ہے رب دا
آیا ویلا کتھے ہتھوں نہ گنوائیے، میلے نے وچھڑ جانا
داتا میرا کرماں والا، محفلاں لگیاں رہن ایہہ شالا
کہہ کے داتا داتا زندگی سجائیے، میلے نے وچھڑ جانا
کوئی ہونا کوئی ہونا ناہیں کسے رونا کسے رونا ناہیں
بریؔ یار نہ کتھے پچھتائیے، میلے نے وچھڑ جانا
بری نظامی
