محبت دے دل چوں پلیکھے نی جاندے
محبت دے مجبور ویکھے نی جاندے
محبت نے مجنوں نوں کاسہ پھڑایا
محبت نے رانجھے نوں جوگی بنڑایا
محبت دے لٹے تے ہو جانڑ دیوانے
محبت دی دنیا دے دستور وکھرے
محبت دی نگری دے مجبور وکھرے
محبت دلاں دی کدورت مٹاوے
محبت ہی بندے نوں رب نال ملاوے
محبت نے یوسف نوں مصرے وکایا
محبت زلیخا نوں وی آزمایا
محبت دے وکھرے تانے تے بانڑے
ایہہ جس تن نوں لگدی اے او تن جانڑے
محبت دے رونے تے ہاسے نے وکھرے
محبت دے جھِڑکاں دلاسے نے وکھرے
محبت نے کڈھیاں نےدودھ دیاں نہراں
محبت نی منگدی کسی دیاں خیراں
محبت دی سب توں اے وکھری کہانڑی
نہ سُکھی راجہ، نہ سُکھی رانی
محبت نے جنے وی گائے ترانے
ایہہ جس تن نوں لگدی اے او تن جانڑے
محبت نے ہیراں نوں زہراں پلائیاں
محبت دی نگری چوں گیاں نہ آئیاں
محبت دے اجڑے کدی وی نہیں وسدے
محبت دے روندے کدی وی نہیں ہنسدے
محبت نے مہینوال نوں آزمایا
محبت نہ ویکھے اپنڑا پرایا
محبت دے بدلن کدی نہ زمانے
ایہہ جس تن نوں لگدی اے او تن جانڑے
محبت ہی سسیاں نوں ریتاں تے ساڑے
محبت نے وسدے کئی گھر اجاڑے
محبت دی سوہنی چنانہہ وچ روڑے
محبت ای لہو پئی دلاں دا نچوڑے
محبت نے منصور سولی چڑھایا
محبت نے صادقؔ بلھا نچایا
محبت دی اکھ دے نے وکھرے نشانے
ایہہ جس تن نوں لگدی اے او تن جانڑے
ایس ایم صادق
(شیخ محمد صادق حسین)
