مینوں سوچا دیاں دے گیا سوغاتاں، سُکھ ماہی نال لے گیا
نال دُکھاں دے کرا کے ملاقاتاں، سُکھ ماہی نال لے گیا
اکھیاں دے وچ اتھرو لے کے ویکھاں اوہدیاں راہواں بہہ کے
کس نوں دل دا حال سناواں، اج وی طعنے دین اوہ تھاواں
جتھے کردے ساں بہہ کے گلاں باتاں، سُکھ ماہی نال لے گیا
کون کسے دا درد ونڈاوے، یار کسے دا دُور نہ جاوے
نِت اکھاں وِچ لنگھدیاں راتاں، سُکھ ماہی نال لے گیا
مینوں سوچا دیاں دے گیا سوغاتاں، سُکھ ماہی نال لے گیا
نال دکھاں دے کرا کے ملاقاتاں، سُکھ ماہی نال لے گیا
ایس ایم صادق
(شیخ محمد صادق حسین)
