واسطہ ای رب دا توں جاویں وے کبوترا

گیت

واسطہ ای رب دا تُوں جاویں وے کبوترا

چٹھی میرے ڈھول نُوں پوچاویں وے کبوترا

اوکھیاں تے لمیاں منزلاں نے تیریاں

راہ دے وچ لکھاں نے طوفاں تے ہنیریاں

ویکھیں کِتے حوصلہ نہ ڈھاویں وے کبوترا

واسطہ ای رب دا تُوں جاویں وے کبوترا

آکھیں پہلوں ہنجواں تے ہاواں دا سلام وے

دل وچ ڈبیاں نگاہواں دا سلام وے

فیر ساڈا حال توں سناویں وے کبوترا

واسطہ ای رب دا تُوں جاویں وے کبوترا

جدے پچھے چین ساڈے دل دا توں لٹیا

ظالماں نے اج اوہنوں قید وچ سٹیا

پوری گل کھول کے سناویں وے کبوترا

واسطہ ای رب دا تُوں جاویں وے کبوترا

واسطہ بہادری دا تے سوں تینوں پیار دی

آکھیں آ جا تینوں تیری نوراں اے پکاردی

ماہی جے نہ آیا تُوں نہ آویں وے کبوترا

واسطہ ای رب دا توں جاویں وے کبوترا

ویکھیں کِتے حوصلہ نہ ڈھاویں وے کبوترا

واسطہ ای رب دا تُوں جاویں وے کبوترا

طفیل ہوشیارپوری

http://www.dailymotion.com/video/x2q6u7p