ون دا بوٹا
میں ون دا سنگھنا بوٹا
ٹھنڈیاں میریاں چھاواں
مٹھیاں میریاں پیلو
وے توں راہیا جاندیا
بھکھن، بھانیا ماندیا
آ جھٹ کو ساہ لے
میریاں پیلو کھا لے
میری چھاویں بہہ لے
میں ون دا سنگھنا بوٹا
ٹھنڈیاں میریاں چھاواں
کی ہویا پندھ سارا اگے
کی ہویا دن سر توں ڈھلیا
جیون پینڈا ڈونگھا منیا
پر انج دھپے سڑیاں
دھدل پھکیاں کجھ نہیں بنڑدا
اوہو جھٹ سہانے
جیہڑے چھاواں ہیٹھ وہانے
ایہہ چھاواں وی چار دہاڑے
چار دہاڑے جوبن
مڑ پَتراں نے جھڑناں
اج آ کے بہہ لے تھلے
میں ون دا بوٹا سنگھنا
ٹھنڈیاں میریاں چھاواں
شریف کنجاہی