نی عشق دے پچھے نہ پو سسيے تے چھڈ دے عشق دا کھيڑا
نی بالاں وانگر ضد نہ کر توں عشق دا راہ اے بھيڑا
شِخر دوپہراں وا وِرولے تے مارُو تھل دے پينڈے
بریؔ نظامی کہنڑ سيانے،۔ عشق دا روگ اويڑا
نی اُوٹھاں والے ٹُر جانڑ گے فير لبھدی پھريں گی ہانڑيں
سسيے جاگدی رہيں رات اَج دی نيند نہ مانڑیں
نی اُوٹھاں والے ٹُر جانڑ گے ۔۔۔۔
او عشق ہوراں دے پچھے لگ کے اتے کوئ پچھے نئیں مڑیا
کسے نے تخت ہزارا چھڈیا، اتے کوئی چناں وِچ رُڑھیا
منزل اتے کوئی کوئی جاندا، ویکھیا بریؔ نظامی
سسیے اوہنوں موت سہیڑی، عشق ولے جیہڑا ٹُریا
پير پير تے پينڑ پوليکھے ایہہ اے عشق دوارا
توں الہڑ مُٹيار ايانڑی تيرا روپ کوارا
نی پھلاں جیہے مُکھڑے تے کِتے شِخر دوپہر نہ تانڑیں
نی سسسيے جاگدی رہيں، رات اج دی نيند نہ مانڑيں
نی اُوٹھاں والے ٹُر جانڑ گے ۔۔۔۔
عشق ہوراں دی کے پچھدے او، اتے عشق دیاں کیا باتاں
رو رو کے دن کڈھنے پیندے، اتے جاگ جاگ کے راتاں
اوہ شِخر دوپہراں مِٹھیاں زہراں، اتے ویکھ چناں دیاں لہراں
ون سونیاں بریؔ نظامی، اوہ پلے پین سوغاتاں
وِچ چناں دے سوہنی ڈُب گئی رات کباباں والی
تیرے نال وی انج نہ ہووے رات شراباں والی
نی ویلا گیا ہتھ نہ آوے، توں ویلا آپ پچھانڑیں
نی سسیئے جاگدی رہئیں رات اج دی نیند نہ مانڑیں
نی اُوٹھاں والے ٹُر جانڑ گے ۔۔۔۔
وے جنہوں پچھیا، اوہنے دسیا او پَنڈ عشق دی بھاری
عشق ولے اوہ پیر ودھاندا اے، مت جنہاں دی ماری
اوہ تُوں کیہ جانڑیں بریؔ نظامی، عشق دیاں تفسیراں
عشق نوں پڑھ پڑھ روندے، کیہہ ملاں، کیہہ قاری
عشق دی راہوں کھُنجے جیہڑے پيندیاں لمياں واٹاں
مرنڑ تيکر نہ مگروں لہندياں عشق دياں ایہہ چاٹاں
نی چھم چھم بدلاں وانگوں کِتے اکھياں تُوں وَس پۓ نہ پانڑیں
نی سَسيے جاگدی رہيں رات اج دی نيند نہ مانڑيں
نی اُوٹھاں والے ٹُر جانڑ گے ۔۔۔۔
اوہ عشق ہوری جدے پچھے پیندے اتے ککھوں کردے ہولا
اج تک کسے دے ہتھ نئیں آیا اوہ پیار دا وا وِرولا
تینوں خبرے خبر نہ ہووے اوہ سن لے بریؔ نظامی
عشق نئیں سُنڑدا، عشق نئیں تکدا، عشق اے گُنگا بہولا
تُوں اُٹھاں دياں ٹلياں سن سن اٹھ پينڑاں کمب کمب کے
مارُو تھل دياں تپدياں ريتاں تھک مرسی ہمب ہمب کے
نی ہر پاسے چہاکے پينڑ گے کِتے يار بریؔ نہ جانڑيں
نی سَسيے جاگدی رہيں رات اج دی نيند نہ مانڑيں
نی اُوٹھاں والے ٹُر جانڑ گے فير لبھدی پھريں گی ہانڑيں
نی اُوٹھاں والے ٹُر جانڑ گے ۔۔۔۔
بری نظامی
