خطاواں
سِر تے پنڈھ گناہواں والی
اچیاں نیویاں راہواں
دس آں مینوں سوہنیاں ربّا
کیہڑے پاسے جاواں
بھید دلاں دے جانے تیتھوں
نیڑے ہوکے سن لے میرے
اج توں ہوکے ہاواں
عجب اے تیری حکمت ربّا
تیریاں عجب اداواں
جو نے تیرے منن والے
او ای پاؤن سزاواں
دل کردا اے تینوں اپنے
دل دی گل سناواں
نفرت والے مسجد مندر
اک اک کر کے ڈھاواں
سُنیاں توں معاف کردیناں
وانگ پیاریاں مانواں
درتیرے تے آیا ارشدؔ
کر دے معاف خطاواں
ارشد سلام بٹ
