ہتھ چوں ہتھ چھڑا نہ بیلی
پیار نوں انج ازما نہ بیلی
ٹٹیا دل فر جڑدا نہیں
اس وِچ غیر وسا نہ بیلی
دکھ اندر دے پھول کے ویکھ
کدی تے سینے لا نہ بیلی
ہجر تیرے نے مار مکایا
ہجر دی دے سزا نہ بیلی
دید تیری درکار اے مینوں
دے کے دید ستا نہ بیلی
منیا تینوں چاه بیٹھے آں
انج تے دل تڑپا نہ بیلی
عشق مرض دا ملے نہ دارو
بھار محبت چاء نہ بیلی
کلے رکھ جئ جندڑی کھندے
دشت ویرانہ راه نہ بیلی
سکھ مقدر مر کے ہونا
ایویں توں گھبرا نہ بیلی
آس دے ویہڑے پھُل کھڑے
اج تے مکھ پرتا نہ بیلی
غافل ہو نہ کھیڈ گوا
اپنا آپ بھلا نہ بیلی
حرص طمع نوں چھڈ دے بندیا
پل دا کریں وساه نہ بیلی
سدھے رای نوں منزل ملدی
الٹیاں راہوں جا نہ بیلی
لا کے دل رلا نہ بیلی
پیار محبت پا نہ بیلی
محمد سلیم
