پنجابی پوٹھواری پوٹھوہاری پہاڑی شاعری
سلام بحضور امام عالی مقام
تُساں شاناں والے دوہترے تُساں نبیؐ ناں لاڈ پیار
تساں مَلَک او وِچ ملائکاں تساں جنت نے سردار
تساں لاڈلے ابو تراب نے تساں نانے پاک نی لج
مکھ لاٹ شہادت لشکنی کئی جئی تساں نی سج
تساں زلف نبیؐ نی تھم کے رہے موہڈیاں اتے سوار
چانن زہراؓ نی اکھ نے، سکھ چین او حیدرؓ نے
تساں کھیڈے گود رسولؐ وؐچ تساں وارث اس گھر نے
سِک دل وِچ نانے پاک نی، وَل کربل ہوئے تیار
ہیٹھ پیر رکاب سی عشق نی تساں حق نے شاہ سوار
تساں ہک مثال صبر نی، تساں دردیاں نے ہمدرد
دھرتی نی اکھ نی تکیا فیر تساں جیا کوئی مرد
تساں ونڈن ہار کوثر دے جتھے پینے بنا حساب
ایتھے پانی بند فرات ناں پھٹ پھٹ کے روئے حباب
تساں جانو مرضی رب نی، تساں جانو رمز رضا
تساں چڑھے نیزے نی نوک تے، تساں دتا درس وفا
تساں ڈوہل کے لہو بنائی حق سچ نی ہک تصویر
تساں نور کتاب قرآن نی کئی جئی کیتی تفسیر
فیر یا حسینؓ! یزیداں ایہہ دنیا کیتی تنگ
پر تساں جیا نہیں کوئی جو کرے انہاں نل جنگ
جاوید احمد
