چڑھیا سجرا سال او یار
رج کے مندے حال او یار
فائرنگ شور شرابے چلے
بڑے دھڑلے نال او یار
ہولاں مقروضاں پائی
چار چفیرے لاشاں پیاں
بھُل گئے حزن ملال او یار
مینوں لگدا سارے ہو گئے
دہشت گرداں نال او یار
اجے تے امن دا پرچم پھڑ کے
نئیں آئے لج پال او یار
دُکھاں نال حیاتی گزری
ہو گئے بڑے نڈھال او یار
دہشت گردی بمب دھماکے
جیون جگت محال او یار
ظلم خیز نظام نوں روکو
جس دا کُل وبال او یار
کدے کسے نے لاگے ہو کے
پُچھے ساڈے حال او یار
عقل شعور تدبر ساتھوں
دور بڑے فی الحال او یار
زندہ قوماں نت وکھائے
معجزے بڑے کمال او یار
اساں تے فرقے نت کھڈاۓ
بڑیاں چاواں نال او یار
طالؔب کرو مداوا کوئی
علم تدبر نال او یار
ق
لُٹ خزانے آپے ہی لے گئے
راکھے بڑے کمال او یار
پھیر سیاستداناں کیتا
بکرے وانگ حلال او یار
چوری سینا زوری ایتھے
اپنا آپ سنبھال او یار
زوراں اُتے نشہ فروشی
بڑے بڑے دھڑیال او یار
ویر پرانے بسیاں کڑھیاں
ہور نہ دیوا بال او یار
پاک صحیفہ پاک صحافت
توں ایدا لجپال او یار
مظلوماں دے نال کھلو جا
سچی کر پڑتال او یار
ظلم جہالت امن دے وَیری
عدل دے دیوے بال او یار
کلیئے پیار محبت والے
طالؔب کدھرے بھال او یار
ق
گھر گھر سوگ تے ماتم ایتھے
ڈاھڈا وقت محال او یار
چور اُچکے لے گئے چودھر
کیتھے نے لجپال او یار
ظلم دیاں سرکاراں ساڈے
کیتے حق پامال او یار
مینوں نیؤں چنگے لگدے
پُکھے ننگے بال او یار
ڈنگ ٹپاؤ پھڑ پھڑ قرضے
چٹے ہو گئے وال او یار
مستقبل دا توں ایں وارث
اپنا وقت سنبھال او یار
امن دی خاطر بابا طالبؔ
بنئے کوئی مثال او یار
بابا طالب بٹالوی
