جدید پنجابی شاعری
گھنڈ مکھڑے تو لاہ او یار
گھنڈ تیرے نے انھے کیتے
کئی پھردے نے چپ چپیتے
کنیاں زہر پیالے پیتے
کئیاں خون جگر دے پیتے
کئیاں اپنی کھل لہائی
کنے چڑھے نے اتے دار
چار دیواری اٹاں دی اے
برج اٹاری اٹاں دی اے
کھیڈ کھڈاری اٹاں دی اے
سبھ اساری اٹاں دی اے
اٹاں دے نال اٹ کھڑکا
میں میں وچوں مکا او یار
گھنڈ مکھڑے تو لاہ او یار
وید کتاباں پڑھ پڑھ تھکا
کجھ نہ بنیاں کچا پکا
اوڑک رہ گیا حکا بکا
مکے گیا تے کجھ نہ مکا
ایویں مک مکیۓ کاہدے
مکدی گل مکا او یار
گھنڈ مکھڑے تو لاہ او یار
مسجد مندر تیرے لئی اے
باہر اندر تیرے لئی اے
دلِ قلندر تیرے لئی اے
سک اک اندر تیرے لئی اے
میرے کول تے دل ای دل اے
اوہدے وچ سما او یار
گھنڈ مکھڑے تو لاہ او یار
مکدی گل مکا او یار
استاد دامن
