پهل لہہ جاون نظراں میریاں توں جد رخِ جاناں نوں ویکھ لیناں
دل دی کلی کهڑ جاندی اے جس ویلےاوہدے لبِ خندان نوں ویکھ لیناں
جَم، اپنے جام نوں رکھ آگے بےشک ایس جہان نوں ویکهدا سی
میں جامِ شراب وچ مار جهاتی کسے ہوری جہان نوں ویکھ لیناں
بهاویں ہاں گنہگار پر مونھ اپنا گریبان اپنے اندر پا کے تے
جہیڑا حشر دیہاڑے نوں پیش ہونائے اپنے فرد عصیان نوں ویکھ لینا
کها کے قسم ایمان دی آج راتیں محفل وچ ساقی انکشاف کیتا
میں ہاڑ کے نال پیمانیاں دے چاہناں، جہدے ایمان نوں ویکھ لیناں
مینوں دل تے جگر سنبھالنے دی کوئی سار نہیں وہندیاں سار رہندی
جدوں قوس ابرو دے نال جڑیا اوہدے تیر مثرگاں نوں ویکھ لیناں
پهاتی ہوئی گرداب دے وچ کشتی باہر جهکڑاں جهانجهیاں کڈهنی اے
لگے آس، کنارے تے لگنے دی میں جدوں طوفان نوں ویکھ لیناں
کامیاب، جنون ہو گیا میرا اوه ہن آپ کدهرے کدهرے آکهدا اے
فضلؔ یاد آجاندائے جس ویلے کسے چاک دامان نوں ویکھ لیناں
پیر فضل گجراتی
