ہر ہر گھر وچ رَب نے رکھیا آؤنا جانا چڑیاں دا
کَناں دے وچ رَس پیا گھولے روز ترانہ چڑیاں دا
دل تے پتھر رکھ کے سارے کاج نبھاؤنے پیندے نیں
کرنا پیندا ہر ماں پیو نُوں رَب خصمانہ چڑیاں دا
رَبا کِیویں بچا اہناں نوں ظلم جبر دیاں تیراں توں
لئی بیٹھے بے کرک شکاری پھیر نشانہ چڑیاں دا
کِدھرے سسی سوہنی بن کے پیار دی بازی لاؤندا اے
کِدھرے زہر پیالہ پیندا پیار دیوانہ چڑیاں دا
توڑ کے سارے رشتے ناطے چھڈ کے سنگت سکھیاں دی
اک دن سوہرے گھر ٹُر جانا کم پرانا چڑیاں دا
بے بس تے کمزور جہیئاں پر کھاہدا نئیں مُردار کدے
ایسے گل نوں پکا ساڈے نال یارانہ چڑیاں دا
اَج توں سوچ دیا بگھیاڑا جو دل آوے کیتی جا
آخرکار تے بھرنا پوسی سب ہرجانہ چڑیاں دا
ایہہ رِیتاں دے پنجرے روز نثارا ٹُٹدے جاندے نیں
لگدا آؤن والا مُڑ کے سماں سہانا چڑیاں دا
