چیت وساکھ دے چن دا چانن
چڑھدے سورج دی اوہ لو
کچے بیراں ورگا جثہ
تکھے ساہنواں دی خوشبو
پنڈ وچ لگا پیر دا میلہ آیا
ویلہ چھیل چھبیلا
ہان نوں ہندا ہان پیارا
سجناں میرے نال کھلو
ہجر ترا اے رگ رگ اندر
شوکر مارے سپ دے وانگر
ساڑے پنڈا ایویں جے کر
چلدی جیٹھ تے ہاڑ دی لو
پپل تھلے بہہ کے جیہڑی
گل سی مکی تیری میری
تینوں اوسے گل دی سوں
ایہہ میتھوں ہن توں وکھ ناں ہو
نال سجن دے رل کے رہنا
ہن نئیں ہور وچھوڑا سہنا
ایویں رس رس جندڑی رولی
لینا اک نہ دینے دو
سرفراز انور صفی
