منبر چھوڑ نہ کرسی منگ
خالق پاک نے لایو رنگ
منبر چھوڑ نہ کرسی منگ
خالق ڈِتو خاص انعام
خلق دا جوڑیس نائب امام
مسجد مانیں صبح شام
منمبر نبویﷺ روز قیام
کتنا تیڈا بلند مقام
توں ہئیں شاہیں وچ اسلام
تیڈا دائرہ کینی تنگ
منبر چھوڑ نہ کرسی منگ
کرم کیتا ہے پاک خُدایا
ہر انسان کُوں بخشیں پایا
کئی نی خالی آدم جایا
کہیں کُوں شاہی تاج پوایا
کہیں کُوں فقر دا جام پلایا
کیڈا رَب احسان ہے لایا
آپ کُوں مولوی صاحب بنایا
اجاں وی رکھدو بئی اُمنگ
منبر چھوڑ نہ کرسی منگ
تیڈا کم راہ ڈکھلاون
تیڈا کم دین سِکھاون
تیڈا کم قرآن سُناون
تیڈا کم نماز پڑھاون
تیڈا کم حق سمجھاون
تیڈا کم درد ونڈاون
تیڈا کم صُلح کرانون
توں پیا ماریں اُلٹے ڈنگ
منبر چھوڑ نہ کرسی منگ
رَب دی کر توں شُکر گزاری
تیکوُں ملی عزت نیاری
توں ہئیں حافظ توں ہئیں قاری
توں ہئیں عالم صحیح بُخاری
قبضے تیڈے قوم ے ساری
تیں کیوں اپنی شان وساری
اج کل تیڈی مت گئی ماری
تو پیا لڑدیں سیاسی جنگ
منبر چھوڑ نہ کرسی منگ
بن تُوں دین اسلام دا غازی
بن توں رُومی بن توں راضی
جذبے ہوون لال شہبازی
تئیں ہے جوڑنی قوم نمازی
درس پڑھا توں سِر سِر بازی
سٹ کے سیاسی دست درازی
ایجھیں کر توں اٹکل بازی
شاھیاں ڈیکھ تے تھیون دنگ
منبر چھوڑ نہ کرسی منگ
قوم اپنی تے تھورا لا توں
بِن لالچ دے دِین سکھا تُوں
مئے توحید خُوب پِلا توں
مدنیﷺ سئیں دا مُحب بنا توں
سبق حیا دے روز پڑھا توں
شیعہ سُنی بغض ونجا توں
مُسلم کٹھے کر ڈکھلا توں
ہتھ بدھے آھدے مست ملنگ
منبر چھوڑ نہ کرسی منگ
