رب کرے اس دھرتی اتے
رب کرے اس دھرتی اُتے
بھورے جِنا دُکھ نہ ہووے
کِسے دا پیلا مُکھ نہ ہووے
کوئی وی سُکا رُکھ نہ ہووے
اِک وی سُنجی کُکھ نہ ہووے
اونتر جانی بُھکھ نہ ہووے
رب کرے اس دھرتی اُتے
کلیاں پُھل ہُلارے ہوون
جگ مگ کردے تارے ہوون
ہر تھاں روپ نظارے ہوون
بندے ڈاڈھے پیارے ہوون
زندگی دے سُکھ سارے ہوون
رب کرے اس دھرتی اُتے
ریجھاں ،سدھراں،چاواں کھیڈن
ٹھنڈیاں ٹھنڈیاں چھاواں کھیڈن
بدلاں نال ہواواں کھیڈن
ساہواں دے سنگ ساہواں کھیڈن
کِنگھری پا پا باہواں کھیڈن
رب کرے اس دھرتی اُتے
تھاں تھاں کھنڈ پتاسے نچن
ہر ویلے ہر پاسے نچن
ہمتاں نال دلاسے نچن
تولے نچن ماسے نچن
جِدھر ویکھو ہاسے نچن
رب کرے اس دھرتی اُتے
ون سَونّیاں ذاتاں مُکن
اُچیاں نیویاں باتاں مُکن
لوڑاں وی کم ذاتاں مُکن
ظُلم دیاں برساتاں مُکن
کال کلوٹیاں راتاں مُکن
رب کرے اس دھرتی اُتے
ہر اک شام سُہانی ہووے
شہد توں مِٹھا پانی ہووے
پُھلاں دی بس ڈھانی ہووے
ہر کوئی راجا رانی ہووے
رب کرے اس دھرتی اُتے
پیار وفا دے میلے ہوون
ہیراں ہوون، بیلے ہوون
خُش گُرواں دے چیلے ہوون
وادھو پیسے دھیلے ہوون
بندے اِنج نہ ویلھے ہوون
ارشاد سندھو
