ٹالھی ویڑھا
ادھی چُھٹی ٹالھی تھلے
ادھو ادھی بوتل پینی
وچ رلا کے ساہ
اکو کپ چوں وارو واری
گُھٹ گُھٹ پینی چاہ
اِکو چمچی نال ای کھانے
زردہ، کھیر، کڑاہ
جُتیاں لاہ کے ننگے پیریں
مانے کنج کنج گھاہ
کول کھلوتے ناگاں دی وی
کرنی نہ پرواہ
اُجڑ گیا فِر ٹالھی ویڑھا
سُنجے ہو گئے راہ
چیت وساکھو سُفنے کھا گئی
جیٹھ ہاڑ دی بھاہ
لیکھاں نے نہ بیجن دِتی
سانجھی کنک کپاہ
اوہ ویلے اوہ گھڑیاں اک دِن
بن گئے گل دا پھاہ
ارشاد سندھو
