ساڈی کوڑ کہانڑی اوکهی
جندڑی جند نمانڑی اوکهی
کیتهاں مکهنڑ کڈهنے اوکهے
رڑکن کیتھ مدهانڑی اوکهی
کیتھ کپاواں وہندیاں مشکل
چرخے کیتھ کتیندے اشکل
تانڑی کیتھ کتانڑی اوکهی
چکی کیتھ پہیندی سووکهی
روٹی کیتھ ودهانڑی اوکهی
چولہے کتهاں بالنڑے مشکل
کنی کیتھ چڑهانڑی اوکهی
بهاواں کیتھ مچاونڑ مشکل
بهاجی کیتھ پکانڑی اوکهی
نلکے کیتھ گڑیندے اوکهے
چاٹی کیتھ اے چانڑی اوکهی
جیونڑ سکھ سو هیلے تهیندے
جنت کیتھ کمانڑی اوکهی
سینی لکڑ بلدی اوکهی
مچ دی مچ مچانڑی اوکهی
سوتی اکھ اٹهاونڑن اوکها
ککڑ بانگ ڈیوانڑی اوکهی
ہنجوں نت لکاونڑ اوکهے
اکهیوں رت وواہنڑ اوکهی
حجوں حج تاں تهیندے اوکهے
مکدی مک مکاونڑ اوکهی
پنوں یار ڈساوے کیڑها
ڈاچی تهل بہانڑی اوکهی
کیچ شہر دی اوکهی منزل
سسی ٹر دی جانڑی اوکهی
تتڑی جند اڈاری بھر دی
تهلوں ریت اوڈانڑی اوکهی
شہر بھنبھور بهلائے بهلدا؟
سچی پریت بهلانڑی اوکهی
اپنڑے دیس روہی دی کہانڑی
تیکوں یاد ڈیوانڑی اوکهی
چڑھ چناں دے ڈونگھے پانڑی
سوہنڑی پار لنگانڑی اوکهی
جندوں جان کڈهیندے ظالم
جیندے جند ملانڑی اوکهی
کچے مٹورے تردے اوکهے
پکی پیت پکانڑی اوکهی
وارث شاہ دی هیر کہانڑی
میکوں آج سنانڑی اوکهی
هیرے، اکھ مٹکا اوکها
کهیڑے نال ٹهہانڑی اوکهی
رانجهے ریت رتاونڑن اوکها
ونجلی کیتھ ونجانڑی اوکهی
عشق دا پہلا ورقا پڑهیئے
پچهاں جند چهڑانڑی اوکهی
ٹهڈی ساہ تاں بهرنا اوکها
ڈوجهے اکھ ملانڑی اوکهی
لانڑی کیڑهی مشکل صاحب
لائیاں توڑ نبهانڑی اوکهی
بنڑ دی گالھ تروڑن اشکل
وگڑی گالھ بنڑانڑی اوکهی
وسدی وستی وسدیاں وستے
اجڑی وت وسانڑی اوکهی
وچ مسیتاں وڑدی خلقت
وت نماز پڑهانڑی اوکهی
جیویں جان لٹیندے پهردیں
ایں ویں جان لٹانڑی اوکهی
سجن میت بنڑانڑے اوکهے
یاری یار کمانڑی اوکهی
ہتهیں سرس جماوے خلقت
مٹی یوں فصل اگانڑی اوکهی
مستوں مست بنڑاونڑ اوکها
الف اوں الک جگانڑی اوکهی
روٹهے یار مناونڑ سوکهے
نچے پریت رجهانڑی اوکهی
تیکهی گالھ دا کرنا اوجها
میٹهی گالھ اکهانڑی اوکهی
پتن، پت، پلیندی مشکل
اکهیں اکھ ملانڑی اوکهی
دولہے نت پرنیجین ودے
جهمر جنج پوانڑی اوکهی
اوچی پوڑی، سوڑے در توں
منجی چهت چهڑانڑی اوکهی
سنجڑی گالھ تاں ایہو ناصر
سچڑی گالھ سنانڑی اوکهی
ناصر خان ناصر
