رانگ نمبر
نویں دور دا ہُوٹر وجیا
رولا چار چفیرے
کاواں پِنڈوں ہجرت کیتی
اِلاں بَین بنیرے
ماری گئی اے مت اساڈی
سمجھاں کیویں آون
کُتے لمبی تان کے سُتے
کندھاں بھونکی جاون
کجھ چوراں توں ڈردے مارے
سادھاں بھیس وٹائے
واپڈا والے لان کچہری
ججاں ڈیم بنائے
سرگھی ویلے کوٹھے چڑھ کے
کُکڑی دیوے بانگ
کُکڑ دے ہتھ ڈانگ
ایس موبائل دی میموری وِچ
سارے نمبر رانگ
وے ربا
سارے نمبر رانگ
احمد نعیم ارشد
