روندیں نہ کر شام اڑی پاگل
تهی ویسوں بدنام اڑی پاگل
قسمت دے وچ وٹ وی ہوندن
سینے دے وچ پهٹ وی ہوندن
ہر کوئی روندے چپ کر روندے
تیڈے ہن کہرام اڑی پاگل
تهی ویسوں بدنام اڑی پاگل
شالا جیوے جگ پردیسی
مر گئیوں کون دعائیں ڈیسی
کہیں دے کارن جیندی رہ ونج
بهلی کریسی رام اڑی پاگل
تهی ویسوں بدنام اڑی پاگل
پاگل کوں کیا ڈکهہ تے غم دی
شان شرم تے بهیم بهرم دی
پاگل تے بس پاگل ہوندن
پاگل دے کیا دام اڑی پاگل
تهی ویسوں بدنام اڑی پاگل
کیا تهیا جیکر رولے آ گئے
گهولئے جهکهڑ جهولے آ گئے
نہ ڈکھ درد آزار ہمیشہ
نہ سکھ چین مدام اڑی پاگل
تهی ویسوں بدنام اڑی پاگل
طارق صبروں بهانگیں ہوندن
بهاگ بهرے ہوئے مانگیں ہوندن
ہار سمجھ کے گل وچ پا نہ
مونجھ مکانڑ متام اڑی پاگل
تهی ویسوں بدنام اڑی پاگل
احمد خان طارق
No comments:
Post a Comment
Note: only a member of this blog may post a comment.