کنج بدلے نیں راہ وے ڈھولا
واہ وے ڈھولا، واہ وے ڈھولا
رکھنی نہیں تے بیجی کیوں سی
سانجھی کنک کپاہ وے ڈھولا
میتاں نال ای ہوندے رہے نیں
ایتھے روز "ویاہ" وے ڈھولا
ہوندے نہیں پر ہو جاندے نیں
لوکیں بے پرواہ وے ڈھولا
ہر اک "عید وساکھی" لنگھی
بھر بھر ٹھنڈے ساہ وے ڈھولا
آ! فیر "ویہڑا" اِکو کرئیے
کند نوں دئیے ڈھا وے ڈھولا
ساڈے چن وی چنھے نکلے
سورج کالے شاہ وے ڈھولا
ہوشاں آئیاں جد سی پا لئی
سر وچ آپ سواہ وے ڈھولا
ہوندے نئیں پر ہو جاندے نیں
لوکیں بے پرواہ وے ڈھولا
ستلج "کنڈھے" رل کے پیتی
بھل گیؤں گُڑ دی چاہ وے ڈھولا
کیہ کھٹیا اے من مرضی دے
گل وچ پا کے پھاہ وے ڈھولا
میتھوں "وَدھ" تینوں اُڈیکے
میرے پِنڈ دی راہ وے ڈھولا
ہن نہیں سندھو باجھوں پیندے
اوہ کنکاں دے گاہ وے ڈھولا
ارشاد سندھو
No comments:
Post a Comment
Note: only a member of this blog may post a comment.