آیا نند کشور
پچھے پچھے رزق دے
آیا نند کشور
چل کے دور بہار توں
گڈی بیٹھ سیالدا
نال بتھیرے ہور
رام کلی وی نال سی
سگھڑ لُگائی اوس دی
لدھیانے دے کول ہی
اک پنڈ باڑیوال وچ
جڑھ لگی تے پنگری
رام کلی دی کُکھ 'چوں
جنمی بیٹی اوس دی
ناں دھریا سی مادھوری
کل میں دیکھی مادھوری
اوسے پنڈ سکول وچ
گُتاں بنھ کے رِبن وچ
سوہنی پٹی پوچ کے
اوڑا ایڑا لکھ رہی
اوڑا ایڑا لکھ رہی
بیٹی نند کشور دی
کِناں گُوڑھا ساک ہے
اکھراں تے رزق دا
ایسے پِنڈ دے لاڈلے
پوتے اچھر سنگھ دے
اپنے پیو دی کار وچ
بہہ لدھیانے آنودے
کونوینٹ وچ پڑھ رہے
اے، بی، سی، ڈی سِکھدے
اے، بی، سی، ڈی سِکھدے
پوتے اچھر سنگھ دے
کِناں گُوڑھا ساک ہے
اکھر اتے اکانکھیا
پچھے پچھے رزق دے
آیا نند کشور
سرجیت پاتر
No comments:
Post a Comment
Note: only a member of this blog may post a comment.