محبت بہوں ضروری ہے
محبت تہوں ضروری ہے
محبت ٹیک ڈیندی ہے
پُرانی بند حویلی دی
سِوی کھادی مُہاڑی کوں
محبت آپ صندل ہے
اے صندل کر چھوڑیندی ہے
کلھیپے دی کہاڑی کوں
محبت ونج چریندی ہے
لِیاٹیں وچ اَجڑ ساڈے
(من و تو دے )
محبت وادئ سینا
محبت طور رکھدی ہے
محبت زر دے کتے کوں
آساں توں دور رکھدی ہے
محبت ڈر دے دھاگے وچ
کئی صدیاں توں بدھے ہوئے
اَساڈے پَکھ کھولیندی ہے
محبت ساڈے مَتھے وچ
تریجھی اَکھ کھلیندی ہے
محبت تہوں ضروری ہے
محبت بہوں ضروری ہے
زبیر احمد چچہ
No comments:
Post a Comment
Note: only a member of this blog may post a comment.