گھڑی گھڑی مجال ہے کمال ہے

گھڑی گھڑی مجال ہے، کمال ہے

اے دلبری دا حال ہے، کمال ہے

حضور بے ڈِکھی تاں نئیں اے بھوئیں سروں

جتھاں جتھاں جمال ہے، کمال ہے

کتھائیں کتھائیں بلندیاں وی خوب ہن

کتھائیں کتھائیں زِوال ہے، کمال ہے

تُوں یار ہیں جے کر تاں شاندار ہیں

جیکر تیڈی اے چال ہے، کمال ہے

کمال ہے میڈا خیال ہے تیکوں

تیکوں میڈا خیال ہے، کمال ہے

تائیں اینجھے زخم دان کیتے جئیں ڈٹھے

اُوں سمجھے لال شال ہے، کمال ہے

میں آپ اپنڑیں آپ نال کائے نمھی

تیڈا خیال نال ہے، کمال ہے

ہے خود کشی حرام تیڈے دِین وِچ

مگر قتل حلال ہے، کمال ہے

پلک پلک دے ماتمی ہسے اساں

قدم قدم دھمال ہے، کمال ہے

اصغر گورمانی