وارو واری ساڈے گل وچ پا کے ڈور تماشا
کردے پئے نیں کِنے چِر توں رَل کے چور تماشا
جِتھے ہووے باگاں دے وچ اُلواں دی سرداری
بندے رہندے کاواں ہتھوں تِتّر مور تماشا
ہور تماشا کر لئے اُنج پر، ہور تماشا کریاں
ویکھیں کِدھرے بن نہ جاوے ہور دا ہور تماشا
ڈھیر تماشے ہتھوں جِس لے ڈھیر تماشا بن گئے
شہراں نے فر پِنڈاں وَلے دِتا ٹور تماشا
اِنج دی غزل اُلیکاں جس دا انگ انگ نچدا ہووے
اک اک ساہ تے کردی ہووے اک اک پور تماشا
بندے پوری کھا کے وی نہیں اِنج دعاواں دیندے
میں تکیا اے پکھؤاں اگے سُٹ کے بھور تماشا
ازلاں توں اس دھرتی اُتے سارے وانگ مداری
اپنا اپنا کردے پھِردے لا کے زور تماشا
اج تماشے وچ میں آیاں آپ تماشا بن کے
اج وی آکھیں جے نہ دیوے اج وی لور تماشا
بھرنے آں نہیں بھریا جاندا کوڑا گُھٹ وی ساتھوں
جیون وِچ اے دِتا اوہنے اینا کھور تماشا
بُلھاں اُتے اُنگلاں دھر کے تکنا سارے لوکاں
جس دن سندھو اک تھاں کیتا چُپ تے شور تماشا
ارشاد سندھو
No comments:
Post a Comment
Note: only a member of this blog may post a comment.