میرا شاعر ہون نوں جی کردا
بِن شاعر بنیاں نہیں سردا
اک ہے تنویر بخاری جی
گل کردا بڑی پیاری جی
اوہدی سب توں رمز نیاری جی
اوہ خالی بھانڈیاں نوں بھردا
میرا شاعر ہون نوں جی کردا
اک سُنیا شوق عرفانی اے
اوہ فن دا مہاں گیانی اے
اوہ شعر سخن دا دانی اے
کھڑکا دیاں کُنڈا اس در دا
میرا شاعر ہون نوں جی کردا
کئی کہن عبیر وی چنگا اے
اوہ علم ادب دی گنگا اے
اوہ شاعر رنگ برنگا اے
جا بن جا اس دا توں بردا
میرا شاعر ہون نوں جی کردا
نور کپور تھلوی
نور محمد نور
No comments:
Post a Comment
Note: only a member of this blog may post a comment.