میرے مولا عطا کر تخیل گری میرے غربت کده تے صنم آونڑاں اے
مثل فردوس دھرتی دا سینہ ہووے بے نظر کول نظر کرم آونڑاں اے
پربتاں دی بلندی نوں بدل چمنڑ کجھ معطر فضا وچ موسیقی ہووے
تارے لڑیاں تے سورج ڈهونڑ عرش توں ہر سجاوٹ دے وچ ہر باریکی ہووے
رنگ برنگی ہوواں دا آنچل ہووے، موج فطرت دا منظر حقیقی پووے
ہر ہتھیلی تے چندن دی مہندی ہووے لیک بخت سکندر دی لیکی ہووے
ہر زبان تے اعلانے بشارت ہووے انہاں آونڑا اے خدا دی قسم آونڑاں اے
میرے مولا عطا کر تخیل گری میرے غربت کده تے صنم آونڑاں اے
ہر شجر تے ثمر لعل و گوہر دسنڑ پتے پتے تے تصویر اوہدی ہووے
موسماں نوں شرابِ طہورا ملے، دل دے کاغذ تے تحریر اوہدی ہووے
نقشہ جنت دا رب نوں بدلنا پووے، ایسی نایاب جاگیر اوہدی ہووے
زلفاں بکهرن ہوا وچ فسانہ لکهنڑ ہر فسانے دی تفسیر اوہدی ہووے
مٹی تائیں تاں تینوں چمیندا پیا، تیتهے فخر حسن دا قدم آونڑاں اے
میرے مولا عطا کر تخیل گری میرے غربت کده تے صنم آونڑاں اے
خضر لمبی حیاتی توں باغی دسے اس گھڑی دا مؤدب نمازی دسے
عشق ہٹ کے بزرگی توں گبهرو دسے، سوچ کیچم دے صحرا دی غازی دسے
تتلیاں دیاں قطاراں اوہدا ناں لکهنڑ، گل حقیقی ہووے، رنگ مجازی دسے
ٹهمریاں بهیرویں کافیاں دادرے، ساز دھیمے ہوون بے نیازی دسے
دل بے قابو نہ ہو ورنہ میں جانڑدا اے، بے بهرم کول صاحب بھرم آونڑاں اے
میرے مولا عطا کر تخیل گری میرے غربت کده تے صنم آونڑاں اے
میرے ہتھ وچ حیاتی دا سہرا ہووے اونہوں پاونڑ دا غیبوں اشارہ ہووے
اس خوشی وچ میرا دل ترکڑا رہوے، ذوق دیدار وچ ہر نظارہ ہووے
مخملی باہیں آ کے جداں گل پوونڑ با خدا ہور کوئی نہ سہارا ہووے
سامنے تیرے عابد کهلوتا ہووے، تیری صورت دا پڑهدا سپاره ہووے
میرا ماضی توں میرا مصلیٰ بنڑیں اس عبادت دا ویکهنڑ عزم آونڑاں اے
میرے مولا عطا کر تخیل گری میرے غربت کده تے صنم آونڑاں اے
عابد تمیمی
No comments:
Post a Comment
Note: only a member of this blog may post a comment.