اوتھے عملاں دے ہونے نے نبیڑے کسے نئیں تیری ذات پُچھنی
چوٹھے مان تیرے چوٹھے سب چیڑے کسے نئیں تیری ذات پچھنی
اوتھے عملاں دے ہونے نے نبیڑے کسے نئیں تیری ذات پچھنی
جو گھڑہیا سو پجناں اک دن جو بنیا سو ڈھیناں
آخر چھڈنے محل منارے بیٹھ صدا نئیں رہنا
چار دناں دا میلا ایتھے بوہتی دیر نئیں بینا
جو بیجے گا صادق چلہیا اوہو ای وڈنا پیناں
اوتھے عملاں دے ہونے نے نبیڑے کسے نئیں تیری ذات پچھنی
کول نئیں رکھنا پین پراواں پل وچ جا دفنانا
ٹر جانا تینوں سب نے چھڈ بوہتا چر نئیں لانا
مک جانے سب چیڑے تیرے ہیٹھ مٹی جد آنا
اس دن صادق رُسے نوں تینوں کسے نئیں آن منانا
اوتھے عملاں دے ہونے نے نبیڑے کسے نئیں تیری ذات پچھنی
تینوں موہڈا دے کے ٹورنا جہان نے
آنا مٹی تھلے تیری اُچی شان نے
سُنجے چھڈ کے تُو ٹُر جانا ویہڑے کسے نئیں تیری ذات پچھنی
اوتھے عملاں دے ہونے نے نبیڑے کسے نئیں تیری ذات پچھنی
چوٹھے مان تے آکڑ تیری چوٹھیاں تیریاں باتاں
گلاں نال بناوے پَل وچ دناں نوں کالیاں راتاں
چوٹھے محل منارے تیرے چوٹھیاں تیریاں ذاتاں
عملاں باہجوں صادق اوتھے کسے نئیں لینیاں واتاں
اوتھے عملاں دے ہونے نے نبیڑے کسے نئیں تیری ذات پچھنی
کسے کول گھڑی پَل ناں کھلونا اے
کیتی اپنی نوں ساریاں نے رونا اے
ہونے وکھو وکھ سنگی ساتھی جیہڑے کسے نئیں تیری ذات پچھنی
اوتھے عملاں دے ہونے نے نبیڑے کسے نئیں تیری ذات پچھنی
پنچھی وانگوں اُڈ جانا اے اک دن مار اُڈاری
قدر اونہاں دی پینی اوتھے عمل جنہاں دے بھاری
ہر شے چھڈنی پینی بندیا جان توں جیہڑی پیاری
اج ٹُریا کوئی کل ٹُر جانا صادق وارو واری
اوتھے عملاں دے ہونے نے نبیڑے کسے نئیں تیری ذات پچھنی
وے بول زبان توں بول چنگا مٹھے بول دا جگ اسیر ہوندا
مندا بول کدی مونہوں کڈئیے نہ مندا بول سجناں، تکھا تیر ہوندا
اک بول جہان وچوں رد دتا اک بول تیرا اکسیر ہوندا
چنگے بول دا بولیا شان اچا چنگے بول دا چنگا اخیر ہوندا
اوتھے عملاں دے ہونے نے نبیڑے کسے نئیں تیری ذات پچھنی
کسے روندے نوں ہسایا اے تے دس خاں
کسے پکھے نوں رجایا اے تے دس خاں
راہ چوں نوں روڑے نوں ہٹایا اے تے دس خاں
کدی زخمی کسے دا پھٹ نئیوں سیتا
ایویں پھیری آ تسبیح ککھ نئیوں کیتا
اوتھے عملاں دے ہونے نے نبیڑے کسے نئیں تیری ذات پچھنی
راہ چھڈیا دیانتداری دا ول دسیں چوری یاری دا
کرناس نا نہ نیکو کاری دا، نیکاں نوں بدی سکھاویں تُو
اوتھے عملاں دے ہونے نے نبیڑے کسے نئیں تیری ذات پچھنی
لک لک دے سودے کرنا ایں، بن محنت بوجھے پرھنا ایں
سادھاں نوں چور بناویں تُو ،تُو نہ اللہ کولوں ڈر دا ایں
اوتھے عملاں دے ہونے نے نبیڑے کسے نئیں تیری ذات پچھنی
پہلوں عملاں دی کھلناں کتاب نیں
ویکھے جانے فیر سب دے حساب نیں
صادق آپو آپ ہونے نے نکھیڑے کسے نئیں تیری ذات پچھنی
اوتھے عملاں دے ہونے نے نبیڑے کسے نئیں تیری ذات پچھنی
ایس ایم صادق
(شیخ محمد صادق حسین)
No comments:
Post a Comment
Note: only a member of this blog may post a comment.