اک ویلے سوکن ورگے نوں
کُجھ ڈب کھڑبیاں واواں نوں
کُجھ اگ وچ نہاتے بدلاں نوں
اک دندیاں کڈھدے سورج نوں
ساڈا چن دے کول کھلونا وی نہ پُجیا
رل کے ہسنا رونا وی نہ پُجیا
کُجھ اندروں سُکے ساون نوں
کُجھ سڑیل ہاڑو دُھپاں نوں
اک کڑمی جیٹھڑ ڈھاوی نوں
ساڈا لُس لُس کردا چیتر وی نہ پُجیا
دل تے ہسدا کھیتر وی نہ پُجیا
کُجھ ڈولے کھاندیاں شاماں نوں
کُجھ موج مناؤندیاں راتاں نوں
اک مُڈھ دے ڈھیٹھ انھیرے نوں
ساڈا اکو اک سویرا وی نہ پُجیا
میرا نہ سہی، تیرا وی نہ پُجیا
کُجھ ڈھیر ندیدیاں اکھاں نوں
کُجھ بُہتے بُھکھے ڈِھڈاں نوں
اک لوبھ دے کالے پھنیر نوں
اسیں رُکھی سُکی کھاندے وی نہ پُجے
دُکھ تے سُکھ ونڈاندے وی نہ پُجے
کُجھ بندے کھانیاں گِرجھاں نوں
کُجھ ڈھیر فسادی کاواں نوں
اک اونتر جانی چِربل نوں
ساڈے سانجھے وٹاں بَنے وی نہ پُجے
کنک، کپاہواں گنے وی نہ پُجے
کُجھ کالے خونی رِچھاں نوں
کُجھ گِدڑاں تے بگھیاڑاں نوں
اک لولے لنگڑے باندر نوں
ساڈے رلویں جنڈ تے بیلے وی نہ پُجے
لگدے تھاں تھاں میلے وی نہ پُجے
کُجھ آپے جوڑے منڈلاں نوں
کُجھ رسم رواج دے بولھاں نوں
اک مذہباں دے کھلواڑے نوں
ساڈی اک تھاں عید وساکھی وی نہ پُجی
کھنڈ گھیو تے ماکھی وی نہ پُجی
کُجھ بُسیاں ہویاں سوچاں نوں
کُجھ تُھڑکے ہوئے ذہناں نوں
اک وہماں مارے ٹولے نوں
ساڈی گُڑ توں مٹھی بولی وی نہ پُجی
کھارے کھٹ گھڑولی وی نہ پُجی
کُجھ نِیتاں ماریاں رُتاں نوں
کُجھ دُھر دے کالے لیکھاں نوں
اک ویلے سوکن ورگے نوں
ساڈا اکو گھر وچ رہنا وی نہ پُجیا
رل کے اٹھنا بہنا وی نہ پُجیا
ارشاد سندھو
No comments:
Post a Comment
Note: only a member of this blog may post a comment.