میں کمی آں
میں ازلاں توں ای کمی آں
میں ہستی اپنی ویکھی ناں
اچیاں نال لائی پِھرنی آں
میرے دل وچ اوہدی چاہ جو اے
او ذات دا اچا شاہ جو اے
مینوں راہ وی دِسدی منزل اے
مینوں روڑے دِسدے نیلم نیں
مینوں ہر اِک ٹُھڈا فیض دِسے
میرے رہواں وچ اوہدی راہ جو اے
او ذات دا اچا شاہ جو اے
میں جِندڑی پِی دے سنگ لاواں
بس پریتم پریتم کردی راں
میں توڑ نبھائی رکھنی اے
ایس جُثے وچ ہن ساہ جو اے
او ذات دا اچا شاہ جو اے
او آپ وی منت ورگا اے
اوہنوں آپ دعاواں منگدیاں نیں
اوہنوں دیپ وی ویکھ کے بلدے نیں
اوہدا در میری درگاہ جو اے
او ذات دا اچا شاہ جو اے
میں کلموہی، میں کرم جلی
میں جِناں اگے ودھنی آں
مینوں اوناں پچھاں لے جاندا اے
خورے بخت ای میرا سیاہ جو اے
او ذات دا اچا شاہ جو اے
او حاصل میری منت دا
اوہدی دید اے درشن جنت دا
اوہدے فیض توں سارے تردے نیں
اوہدی مرشد پھڑ لئی بانہہ جو اے
او ذات دا اچا شاہ جو اے
جگ سارا ہار کے بہہ گئی آں
اک اوہدی ہو کے رہ گئی آں
ہن کسی وی تھاں دی لوڑ نئیں
اوہدے نیناں وچ پناہ جو اے
او ذات دا اچا شاہ جو اے
مینوں دید کرائی مالک نے
میرے روگ مُکائے مالک نے
او میرے حال دا جانڑوں اے
او سبھ تے رکھدا نگاہ جو اے
او ذات دا اچا شاہ جو اے
عالیہ شاہ
No comments:
Post a Comment
Note: only a member of this blog may post a comment.