ایس ورہے میں سوچ رہیا واں
اپنے آپ نوں کول بٹھا کے
روز اک فوٹو کھچاں
اپنا حال سنا کے خود نوں
اپنا حال ہی پچھاں
اک اک درد سناواں دل نوں
اک اک دکھڑا دساں
اپنے سینے لگ کے روواں
اپنےآپ ای ہساں
گھپ ہنیریاں راتاں کولوں
بھورا نہ گھبراواں
رسی سٹ کے انبراں وچوں
چانن کڈھ لیاواں
ایس ورہے وی سوچیا اے کہ
ہور محبت نہیں کرنی
دل کسے نوں نہیں دینا
جان تلی تے نہیں دھرنی
صغیر تبسم
No comments:
Post a Comment
Note: only a member of this blog may post a comment.