توں کیہ کیتا
پچھدا اے
توں کیہ کیتا؟
ورھیاں توں میں آٹا گُنیا
روٹی ویلی، چوری کُٹی
پُرکھاں دی عزت رکھنا سِکھیا
پیار کرن دی رِیت ودھائی
پچھدی اے
توں کیہ کیتا؟
تینوں گہنا، جُتی، لیڑا لے کے دِتا
چُگھی وچوں کڈھ کے تینوں کنداں دِتیاں
اُچا بولنا سکھیا
تے شبداں دی ہیرا پھیری وی سِکھی
پچھدا اے
توں کیہ کیتا؟
نبی پیغمبر غوث میں جمے
میں رنگاں نوں انگ دِتا اے
سسّی، ہیر تے سوہنی آں میں
تیرے ورگا لِکھ سکدی آں
(ڈر دی ماری)
پچھدی اے
توں کیہ کیتا؟
نبی پیغمبر غوث بنے آں
صوفی ملا خاکی بندے
عرشاں تیکر سِکہ چلدا اے
رب وی سانوں مندا اے
ایہ جو توں نظماں کہنی ایں
ایہناں دا خالق وی میں آں
ہے کوئی تیری اپنی جاتی؟
جس تے ٹر کے
اپنا آپ مناویں توں؟
پچھدا اے
توں کیہ کیتا؟
(وچوں وچ ای سڑدی کہندی)
مینوں کہنا پینا اے
اپنی جاتی، اپنے اکھر، اپنے کھیڈ نیں لبھنے پینے
جا وے چُک لے اپنے دوہڑے
جا وے چُک لے اپنی وردی
ٹھیک اے، تد ملاں گے جد میں
اپنا وی کُج لبھ لیائی
رب دے ناں دی ونڈ چوں خود نوں کڈھ لیائی
ردا میر
No comments:
Post a Comment
Note: only a member of this blog may post a comment.