کنے پھُل کنے پات
رنگ رنگ دا کھڈؤنا
میرے سائیں نے بناؤنا
فیر مٹی تے کھلوؤنا
کیہڑے گھر چہ بلوؤنا
کیہڑی منجی تے بٹھوؤنا
کس بن کے پراؤہنا
کیہدا چِت پرچاؤنا
کنے ویکھنا وکھاؤنا
کون چھائیں مان دا
میرا سائیں جان دا
بال، بال، مَچ
کِتھے جھوٹ کِتھے سچ
اوہ تے رنگ ویکھدا
سارے ڈھنگ ویکھدا
کدھی کھچے، کدھی چھڈے
کر تنگ، ویکھدا
پھرے انگ انگ
سارے سنگ ویکھدا
کون کیہدے ہان دا
میرا سائیں جان دا
کِتے چاڑھدا اے دن
کتے پا دیندا رات
لیندا گھڑی وچ مِن
کیہدی کتنی اے ذات
رَکھے سب گِن گِن
کنے پھُل کنے پات
جدوں رَکھ دیندا ہات
اودوں بن جاندی بات
کون ہائیں بال دا
میرا سائیں جان دا
شکیلہ جبیں
No comments:
Post a Comment
Note: only a member of this blog may post a comment.