عورتاں دی فصل
(حاملہ ذہن)
ابا ایدکی یار
کنک نئیں بیجنی
بیبیاں بیجنیاں نیں
کنک دی لوڑ کوئی نئیں
پوری بی بی نئیں اُگانی
بس ڈِھڈ توں تھلے دی فصل ہوئے
تے اینہاں نوں ونڈ دیئے
مولویاں نوں دو دو دیواں گے
کہ بچیاں دے جسماں وچوں رسدا خون
مسیت دی مٹی نوں پلیت کردا اے
شے لین گئی دھی جدوں گھر نئیں آندی
روڑیاں توں لاش لبھدی ماں دا دکھ
اینج ای اے جیویں میل آلے دن
لاڑا مر جائے
غیرت چ قتل ہون والی مٹیار
جدوں مرے تے بُلبلاں دے وین نئیں سُنے جاندے
کوئی اینج دی کھاد پائیے
کہ ایہناں دی سوچ
بیبیاں دیاں لتاں وچوں باہر نکلے
شاید جے کوئی بندہ اپنی بیوی نوں
انسان سمجھن لگ جاوے
کنک تے آدم ازل دا رشتہ اے
جے دن او نئیں رئے
تے جانے اے وی نئیں
پر کی اے جے اینج کریاں
دماغی اٹھراہ مُک جاوے
تے اے ذہن حاملہ ہو جاون
سہیل کاہلوں
No comments:
Post a Comment
Note: only a member of this blog may post a comment.