قلم ہو جان جے بانہواں تے قابو چیک نہیں رہندی

 طبیعت ٹھیک نہیں رہندی

٭قلم ہو جان جے بانہواں تے قابو چیک نہیں رہندی٭

کوئی ہتھاں تے قسمت دی نمانی لیک نہیں رہندی

تے فیر ہتھاں چ ہتھ پاون دی کوئی اڈیک نہیں رہندی

طبعیت ٹھیک نہیں رہندی

کوئی منصف جدوں مظلوم نال انصاف نہیں کردا

تے طاقتور کسے ماڑے نوں بالکل معاف نہیں کردا

امن دے نال خالق دی جدوں تخلیق نہیں رہندی

طبعیت ٹھیک نہیں رہندی

جے تھانے جا کے وی سائل کوئی خرچہ نہیں دیندا

تے ایس ایچ او وی اودوں تک اوہدا پرچہ نہیں دیندا

بھکاری کول وی اوتھے تے اوہدی بھیک نہیں رہندی

طبعیت ٹھیک نہیں رہندی

مشقت کر کے وی حاصل جے مہنے ہون تے شاکر

محبت کر کے وی لوکی جے رونے رون تے شاکر

تے فیر سجن تے دشمن دی کوئی تفریق نہیں رہندی

طبعیت ٹھیک نہیں رہندی

کوئی حقدار نوں حق دین تے راضی نہ ہووے تے

عدالت وچ کوئی عادل جدوں قاضی نہ ہووے تے

وراثت وچ نمانی بھین جد شریک نہیں رہندی

طبعیت ٹھیک نہیں رہندی

مدد منگدی ہوئی سڑکاں تے جے خاتون رُل جاوے

دفاع اپنا کرن تے فیر جے قانون تُل جاوے

ہووے تذلیل تے انسان دی تصدیق نہیں رہندی

طبعیت ٹھیک نہیں رہندی

کوئی حق نوں ہوس دا نام دے کے رول دیوے تے

زبردستی کوئی وَٹہ جے گُڑ وچ تول دیوے تے

عقل موٹی جے ہو جاوے نظر باریک نہیں رہندی

طبعیت ٹھیک نہیں رہندی

ظلم انصاف دی خاطر ہمیشہ ماڑا سیہندا اے

کسے غاصب دے شر توں ڈر کے جد مظلوم بیہندا اے

تے ہر غم نال جُڑدا اے خوشی نزدیک نہیں رہندی

طبعیت ٹھیک نہیں رہندی

ہووے مزدور بس مجبور جے مزدوری نہ لبھے

کساناں نوں فصل چا کے وی روٹی پوری ناں لبھے

ہووے جذبہ ناں قائم تے کوئی تحریک نہیں رہندی

طبیعت ٹھیک نہیں رہندی

خبر ٹی وی تے ویکھاں یا کسے اخبار تے ویکھاں

کسے کم ظرف دی میلی نظر جے پیار تے ویکھاں

زندہ ریہن لئی ساہواں دی فیر توفیق نہیں رہندی

طبعیت ٹھیک نہیں رہندی

جدوں بن جان بیلی ٹھگ تے پلّے ککھ ناں رہ جاوے

دعا شاکر دی اے شالا کوئی اپنا وکھ ناں رہ جاوے

وچھڑ جاوے جدوں دلبر تے روح وسنیک نہیں رہندی

طبعیت ٹھیک نہیں رہندی

طبعیت ٹھیک نہیں رہندی

بی اے شاکر

بی اے شاکر ہوراں دیاں دوویں بانہواں وڈھن گئیاں سن، جدا ذکر انہاں اس شعر چ کیتا اے۔