رشتے دی ریج
کدی کدی مینوں رشتیاں دی
بڑی ریج آندی اے
کھبّی جیب چوں دس روپیے کڈ کے
سجّی جیب چ پا لینا واں
مینوں دادے دِتے نے
کدی کسی نکی کند تے بہہ کہ
باہواں ہوا چ کر کے
ہسی جانا
مینوں نانے موڈھیاں تے بٹھایا اے
کدی ٹردیاں آپے ای ڈگ پینا واں
بسم اللہ بسم اللہ کر کے اٹھنا واں
مینوں دادی گل نال لایا اے
کدی دو چار لیڑے لے کے
سڑک ول ٹر پیناں واں
لیہ والی گڈی پچھے
کتھے جانا ای منڈیا؟
رولا پیا پانا واں
مینوں نانی نے بلایا اے
کدی کسے نال لڑ کے تے
پیو دی مار توں ڈردیاں ہویاں
گھر دے بار کھلو جاواں
فر کوئی مینوں آ کے آکھے
چل ہن گھر نوں آجا کاکا
تیرا تایا آیا اے
کدی کدی مینوں رشتیاں
دی بڑی ریج آندی اے
کدی عید تے امی فاخرہ آکھے
جا وے پج کے گری لے آ
سوگی تے بادام وی لے آ
چوکھا دودھ تے سیویاں لیاویں
تیریاں پھوپھیاں آونیاں نے
کدی جے ابا بیمار ہو جاوے
مینوں تے پے وخت جاوے
فون میرا جو وجی جاوے
اپنے آپ نوں پیاں آکھاں
رشتے داراں سیاپا پایا اے
کدی کدی مینوں رشتیاں دی
بڑی ریج آندی اے
سہیل کاہلوں
No comments:
Post a Comment
Note: only a member of this blog may post a comment.