بھنورے نوں جسراں گلاب سوہنا لگدا
اوتراں ای مینوں ایہ پنجاب سوہنا لگدا
ہویا کی جے وڈھ کے تے ٹک کےکھلاریا
کئی تھاؤں اگیا پنجاب سوہنا لگدا
ہجراں دے ماریاں پیاریاں نوں وصلاں تے
یار دیاں نیناں چ چناب سوہنا لگدا
جگ اوہنوں جکڑیا حداں تے حساباں وچ
جہڑا بے حد تے حساب سوہنا لگدا
یار نے ہے پیر پایا واہگڑے دی واڑ تے
کنڈیاں تے ٹکیا گلاب سوہنا لگدا
اڈ واہگے پار جاواں، دادکے تے نانکے
مینوں نکے ہندیوں ایہ خاب سوہنا لگدا
ایناں سوہنا بت ساری عمراں میں پوجیا
آوے جہڑا آوناں، عذاب سوہنا لگدا
سن لئ اے واہگے اتے کونج کرلاوندی
ہن نہیں شاہین تے عقاب سوہنا لگدا
دوویں پاسے جنگ دے ترانیاں دے وچکار
بھائی مردانے دا رباب سوہنا لگدا
جگ سارا لگدا اے بھاویں دیس اپنا ای
رب دی سونہہ ،پر ایہ پنجاب سوہنا لگدا
مہنیوال طارقا ایہ دھرتی جو سوہنی اے
ایہنوں تیرے پٹ دا کباب سوہنا لگدا
طارق گجر
No comments:
Post a Comment
Note: only a member of this blog may post a comment.