جیون ریڑھے اگے اپنے آپ نوں جَونا پیندا اے
جینویں سوہنا آکھی جاوے اونویں ہونا پیندا اے
تیری کالی رات دا چانن اسی دِیوے مٹی دے
سرگی سانوں سورج اگے نینواں ہونا پیندا اے
اے کلیوگ اے بِیبا ایتھے سکھ دا ساہ وی لبھدا نئی
ایتھے زندہ رہن لئی وی اندروں مونا پیندا اے
ایسے کارن ہسناں مینوں ماسا چنگا لگدا نئیں
مگروں چِرکے تائیں کلیاں بہہ کے رونا پیندا اے
نامرداں دی عادت ہوندی گل کر کے پھِر جانا
مرد نوں اپنی گل تے پکے پیر کھلونا پیندا اے
عملاں والا بھار کسے وی موہڈا دے کے چانا نئیں
او تحسین اے بھار تے سوہنا آپ ای ڈھونا پیندا اے
یونس تحسین
No comments:
Post a Comment
Note: only a member of this blog may post a comment.