دن راتی بس جی پرچاؤندی رہندی آں
خواب وچ تیرے در تے جاؤندی رہندی آں
ساہاں وچ اے خوشبو عطر گلاباں دی
یار دے ناں دا ورد پکاؤندی رہندی آں
من دی کالک من بیٹھا ای صاف کرے
سوہنے رب دے ترلے پاؤندی رہندی آں
انج تے تیری رحمت تے وے مان بڑا
فر وی عیباں توں شرماؤندی رہندی آں
عشق الف تے میم دی کُل کہانی اے
اول آخر سبق پکاؤندی رہندی آں
ہتھ چوں نکلے پنچھی مُڑ کے نئیں آندے
بیٹھی دل نوں اے سمجھاؤندی رہندی آں
راضی آں میں متھے لکھے لیکھاں تے
اویں ہتھ نوں مہندی لاؤندی رہندی آں
نفس سیاپے میرے مگروں لیندے نئیں
منگتے جی نوں چُپ کراؤندی رہندی آں
لوکی مندر مسجد جاندے رہندے نیں
میں تے نچ نچ یار مناؤندی رہندی آں
او ویکھے ناں ویکھے تو ناں اکھیاں مِیٹ
بُھلے دل نوں راہے پاؤندی رہندی آں
صبا نذیر
No comments:
Post a Comment
Note: only a member of this blog may post a comment.