اس حاضر پل نوں جینا سکھ
کوئی رنگ جما کوئی گیت سنڑا
بنھ گنگھرو کدیں دھمالاں پا
پھڑ باہیں دل دیاں سجنڑاں وے
ایدھے نخرے سہہ ایدھے ناز اٹھا
ایس ٹھنڈی واء نوں پنکھ بنڑا کے
امبراں وچ فیر اُڈدا جا
چَھڈ، دل دے سیک تے کی رونڑاں
ہڈ لُوسدے ہن تے لُوسنڑ دے
انہاں ہنجواں نوں توں دِیپ بنڑا
اک وار سجنڑ، دلدار سجنڑ
ایہہ روح دیاں پِیڑاں پاسے رکھ
ایہہ اتھرو گُھول دے رَت وِچ توں
اینہاں سرخ بُلہاں تے ہاسے رکھ
آ ویکھ اشارہ زندگی دا
گل رنگ کنارہ زندگی دا
سُنڑ عشق دی ونجلی کُوکدی اے
ایہدی ہُوک مِٹا
ایہہ تِل تِل مردا جیون اے
اِیدھے درد ونڈا
جو بِیت گیا، سو بِیت گیا
اس حاضر پل نوں جینا سکھ
نہ کل دا بہہ کے سوگ منا
شاہین کاظمی
No comments:
Post a Comment
Note: only a member of this blog may post a comment.