لا تفرقو
پچھلے مہِینے مر گیا ساڈے پنڈ دا چاچا دارا
سِدھا سادہ پہولا پالا(بھولا بھالا) بندہ نیکو کارہ
پینتی 35 سال گزارے اونے کر کے چوکیدارا
نہ کوئی اگے، نہ کوئی پچھے بندہ کلّم کارا
مرن توں پہلاں سارے پنڈ نوں اوس نے کول بلایا
نال خلوصِ نیت اونے دل دا حال سنایا
میرے بعدوں پائیو مینوں ڈھیر ثواب پوچانا
میرے ایس مکان نوں ڈھا کے مسجد تُسی بنانا
اوہدے بعدوں لوکاں رَل کے اوس مکان نوں ڈھایا
ایس تھاں تے ہُنڑ مسجد بنڑسی جھٹ اعلان کرایا
دس دنیا تے ستر آخرت دے کیتی خوب منادی
چندا دیون خاطر ایتھے پہنچی کل آبادی
اپنی مدد آپ تو لوکاں چھتی آپ اراضی
ویکھا ویکھی اوتھے آون لگ پئے چار نمازی
ویکھ آباد مسیت نوں اوتھے کئیاں ٹنگ اڑائی
شعیہ، سنی، دیوبندی، تے وہابی کرن لڑائی
مرنے والاختم درود تے پیراں نوں سی مندا
سنی آکھن؛ سنی سی او حق آ ساڈا بندا
سینے تے ہتھ بنہدا سی او گِٹے وی سَن ننگے
وہابی آکھن وہابی سی او کوئی نہ ایتھے کھنگے
مومن سی او پر کردا سی ماتم کدی کدارے
شیعے آکھن شیعہ سی او نکلو ایتھوں سارے
مرن والا رائے ونڈ دے وچ جاندا سی ہر واری
دیوبندی دے ناطے بنڑدی ساڈی ذمے واری
ایسے تُو تُو، میں میں دے وِچ وِچے رہ گئیاں بانگاں
ایس عوامی دنگل دے وچ کُھلیاں چلیاں ڈانگاں
چھ ست پھٹن، اک دو مُودے، دو تِن ہو گئے کانے
زخمی پہنچے ہسپتال تے باقی پہنچے تھانے
تھانے چلن کیس، تے ہسپتال ڈرپاں ٹیکے
اُتے چاچا دارا پبّاں بھار ثواب اڈیکے
فرقہ بندی کِیتی یارو جِندڑی ساڈی اوکھی
رہ گئی وچ مسیت تے اوتھے بن گئی پُلس دی چوکی
مرلی چوہان
No comments:
Post a Comment
Note: only a member of this blog may post a comment.