ساڈے ہتھوں جوٹھی تھالی جاندی نئیں
پے گیا چسکا تد ہنگالی جاندی نئیں
بیبا سدھراں دھیاں وانگوں ہندیاں نیں
اک وی ہووے سوکھی پالی جاندی نئیں
کنے دیوے آساں لائی بیٹھے نیں
ساڈے کولوں تیلی بالی جاندی نئیں
اوہدے وانگوں خوش آں میں وی اپنے گھر
پر، اوہ دل چوں بھاگاں والی جاندی نئیں
جیہڑے چھوٹی عمرے پنڈاں چک لیندے
اوہناں کولوں سُرت سنبھالی جاندی نئیں
اج وی پاواں وین میں موئیاں سدھراں دے
دل چوں گوہر سن سنتالی جاندی نئیں
گوہر وریاہ
No comments:
Post a Comment
Note: only a member of this blog may post a comment.