اوہ کہندا اے نہ گبھراؤ، نہ گبھراؤ
روٹی دی تھاں مٹی کھاؤ، نہ گبھراؤ
ایہناں کیہڑا پڑھ لکھ افسر بننا ایں
بالاں نوں بندوق پھڑاؤ، نہ گبھراؤ
اصل سکون تے قبر دے وچ ای ملدا اے
جیوندیاں تے وی مٹی پاؤ، نہ گبھراؤ
اینے سوہنے ہو کے وی کیہ کرنا اے
صابن مہنگائے، تے نہ لاؤ، نہ گبھراؤ
آٹا، دالاں، گھیئو تے چینی وادھو اے
مُثبت خبراں سنڑدے جاؤ، نہ گبھراؤ
ہُنڑ تے تُک ای نہیں بنڑدا گبھراون دا
چھتر لاہ لو، لمیاں پاؤ، نہ گھبراؤ
طاہرہ سرا
No comments:
Post a Comment
Note: only a member of this blog may post a comment.