سسی سوہنی صاحباں سہتی ہیر جے ہوئی
لبھے گی کوئی خواباں دی تعبیر جے ہوئی
سجن بیلی حال مِرا سب پُچھدے رہندے
پُچھ کے تے فیر کہندے نے تقدیر جے ہوئی
وقت گزارن دے لئی زندہ رہنا پیندا اے
جُثے دے وچ ساہواں دی زنجیر جے ہوئی
پڑھ کے مینوں روندے پِھردے دنیا والے
اتھراں دے وچ ڈوبی ہوئی تحریر جے ہوئی
رانجھا بن کے تخت ہزارہ چھڈ جاواں گا
جھنگ سیال چ ہور وی کوئی ہیر جے ہوئی
جنھے راہ نے دل دے سارے بند کر لاں گا
دل بستی اُجڑ کے فیر تعمیر جے ہوئی
موتوں پہلاں مر جاندے زُلفاں دے قیدی
اکھ وی اوس قاتل دی اک شمشیر جے ہوئی
مردیاں کلمہ کیویں نصیب ہوئے گا سید
اکھیاں دے وچ کافر دی تصویر جے ہوئی
سید عدید
No comments:
Post a Comment
Note: only a member of this blog may post a comment.