حق دے دیوے بال فقیرا
میں آں تیرے نال فقیرا
توں توں میں میں کر چھڈیا اے
لوکاں دا کیہ حال فقیرا
دن دن کر کے دن آون وچ
لگ جاندے کئی سال فقیرا
سبھ کُجھ لبھدا جےکر لیندے
اک دوجے نوں بھال فقیرا
ہر تھاں بندے فر وی ہر تھاں
بندیاں دا اے کال فقیرا
تر گئے جِہناں ڈُبنا ترنا
بُھل کے ماری چھال فقیرا
ہمت نوں اکڑایاں ٹُٹنے
جِنے وی نیں جال فقیرا
رجواں کم نہ رجویں کھاوے
رجیاں دی اے چال فقیرا
سندھو جہے دریاواں نوں کئی
دھوکا دے گئے کھال فقیرا
ارشاد سندھو
No comments:
Post a Comment
Note: only a member of this blog may post a comment.