کُجھ کُجھ تے سرکاراں چن چڑھائے نیں
باقی دے دستاراں چن چڑھائے نیں
سوچو تو سہی انج بھلا چن چڑھدے نیں
اج کل کِنج اخباراں چن چڑھائے نیں
چار چوفیرے اوہناں دا ای نھیرا اے
رل کے جہڑے یاراں چن چڑھائے نیں
کِنی واری راتاں مل کے مونہاں تے
چٹے دن زردراں چن چڑھائے نیں
چور تے چور نیں اوہناں دا کیہ کرنا جے
جہڑے پہرے داراں چن چڑھائے نیں
تاریخ گواہ اے ویر کرودھ دے دھرتی تے
سارے بے اتباراں چن چڑھائے نیں
ہتھیں پھاہے لا کے سانجھ دے سورج نوں
سندھو کنج دیواراں چن چڑھائے نیں
ارشاد سندھو
No comments:
Post a Comment
Note: only a member of this blog may post a comment.