جاگ وے سمیا جاگ
کِسے چندری اکھ چوں جاگ
چِر توں ٹُٹے تاراں اُتے
کڈھ کوئی زندہ راگ
نہیں تے سبھ نوں کھا جاون گے
اندر سُتے ناگ
جاگ وے سمیا جاگ
بول وے سمیا بول
کِسے ڈھٹھی کندھ چوں بول
کال کلوٹے موتاں ورگے
سارے جندرے کھول
نہیں تے کُجھ وی رہنا نہیں اے
ایتھے جِبھاں کول
ٹور وے سمیا ٹور
کیسے وکھری راہ تے ٹور
دِن نوں پئیاں راتاں وِچوں
اِک کہانی ہور
نہیں تے عمراں بھر نہیں لبھنے
سانوں چن دے چور
ارشاد سندھو
No comments:
Post a Comment
Note: only a member of this blog may post a comment.