٭تاریا وے تاریا٭
تاریا وے تاریا
تُوں ایں گواہ وے
کر کے وساہ وے
تکدی دے راہ وے
ڈُب چلے ساہ وے
اوہنوں نہیوں ڈکیا
اوہدیا ای سکیا
تینوں سی کھلاریا
تاریا وے تاریا
تاریا وے تاریا
بہ میرے کول وے
گل پوری کھول وے
آؤنا نئیں ڈھول وے
جھوٹے تیرے بول وے
میں نئیں ساں مندی
دس پا کے چن دی
توہیوں مینوں ماریا
تاریا وے تاریا
تاریا وے تاریا
لنگھ گئی تریک وے
لائ نئیں میں لیک وے
اوہدی میں اُڈیک وے
رکھی صُبح تیک وے
مُک گئی اے رین وی
تھک گئے نیں نین وی
دِل وی اے ہاریا
تاریا وے تاریا
تاریا وے تاریا
سُن میری گل وے
کڈھ کوئی حل وے
وجیا کُلل وے
مینوں ہر پل وے
جہناں تے ایمان سی
جہڑے جند جان سے
اوہناں نے ای چاریا
تاریا وے تاریا
تاریا وے تاریا
تیرا کیہ خیال وے
چل گئے نیں چال وے
لیکھ میرے نال وے
پُچھدے نئیں حال وے
جال جال بُھکھ میں
زندگی دا سُکھ میں
جہناں توں سی واریا
تاریا وے تاریا
تاریا وے تاریا
توں بیٹھا دور وے
میں آں مجبور وے
کہڑا سی قصور وے
دس ایہ ضرور وے
یار مُکھ موڑ گئے
ایویں دِل توڑ گئے
ویکھ لئے پیاریا
تاریا وے تاریا
تاریا وے تاریا
مینوں نہ بُھلائیں وے
کل چھیتی آئیں وے
دیر نہ توں لائیں وے
کراں گے صلاحیں وے
سبھ کُجھ ڈیہہ گیا
توں ای تے رہ گیا
ساڈیا سہاریا
تاریا وے تاریا
تاریا وے تاریا
ارشاد سندھو
No comments:
Post a Comment
Note: only a member of this blog may post a comment.